Gründungsgeschichte

Fir’d Grindigg vo dr Guggemuusig Quätschkomode, isch d’ Faasnacht 1981 ussschlaaggäbend gsii. Ebbe genau an deere Faasnacht hänn viir Lyt d’ Idee ka “Daas kenne mir au.“ Tatsächlig am 15. April 1982, hänn mer iiglaade zer Grindingsversammlig. Im Reschturant Ziegelhof am Bahnhof in Prattele sinn die erschte 8 Mitgliider zämmegsässe. In de erschte zwai Joor hänn mer in ere privat Garasch broobt, wo denn mit inzwüsche zwelf Aggtive seer äng woorde isch. An dr Faasnacht 1983 und 84 sinn mer nur in Allschwil und Prattele aggtiv gsii.

In de drufffolgende zwai Joor hänn mer im e Schuelhuus in Basel und im Ziiribieter im Gundeli kenne broobe bis, mer denn durch e Zuefall in Wilde Maa im Glaibasel hänn deerfe. Mit de Gülleschlüch und de Tränefurzer hänn mer 8 Joor lang der Broobekäller dailt. Bis denn, 1994, unser langjäärigs Passivmitgliid dr Hausi, uns d’ Rüümligkaite im Haafebeggi 2, in Glaihinnige vermittlet het, dert wo mir hitte no unseri Broobe, Feschter und unseri Sitzige abhalte. Do mir e „ glaini Gugge „ gsii sinn in de erschte Joor ( immer ebbe um die 20 Lytli), hänn sich natirlig die glaine Baize uff unsere Bsuech gfrait. Die gressere Lokal hänn mer de anderne Gugge iberloo.

Mit unserem neue Guggenkäller, isch nadyyrlig au e neui Ziit aabroche. Meer Blatz, fiir meer Aggtivi, e neui guedi musikalischi Laitig het uns gformt zu dämm was mer hiite sinn. Unseri Schtiggli sinn aaschpruchsvoller und komplizierter z’ schpiile, aber ebbe genau das isch dr Blausch. Mir hänn in den letschte 23 Joor viil erläbt, mitgmacht, verarbeitet und glaischtet. Fir mii als Grindinggsmitgliid e unvergässligi Zit. (Pit 2003)

Guggemuusig Quätschkomode an der Fasnacht